Bizkaiko Foru Aldundiak onartu du 80.000 euro bideratzea erlezaintza sustatzeko eta sektore horrek egiten dituen produktuen merkaturatzea hobetzeko laguntzetara. Izan ere, sektorea ekoizpen iraunkorreko eredurik onenetakoa da: ingurunea erabat errespetatzen duen ekoizpena da; polinizazioa errazten du, eta oreka ekologikoari eta biodibertsitateari eusten laguntzen du.

150 erlauntz baino gehiago dituzten erlezainek eta zerga- eta sozietate-egoitza Bizkaian duten eta legez eratuta dauden elkarte sektorialek jaso ahal izango dituzte laguntza hauek.  Eta dirulaguntzak honako hauek finantzatzeko erabiliko dira:

• erlezainei eta erlezainen elkarteei informazioa eta laguntza teknikoa ematetik eratorritako gastuak, hala nola erlezaintza-osasunaren arloko laguntzarako edo aholkularitza orokorrerako teknikariak eta espezialistak kontratatzeko, edo prestakuntza-ikastaroak egiteko, besteak beste.
• Varroasiaren aurkako borroka, tratamendu kimioterapikoen bidez, erlezaintza ekologikoarekin bateragarriak diren tratamenduak aplikatuz edo erlauntzak gainelikatuz eta argizaria berrituz.
• Eztiaren ezaugarri fisiko-kimikoen analisia egitea.
• Erlezaintzaren eta erlezaintzako produktuen sektorean ikerketa-programak garatzen espezializatuta dauden erakundeekiko elkarlana.

Laguntza hauetarako eskabideak lehia-konkurrentziaren araubidean banatuko dira, eta datorren abenduaren 12ra arte aurkeztu ahal izango dira, Bizkaiko Foru Aldundiaren egoitza elektronikoaren bidez, eskualdeko nekazaritza-bulegoetan edo herritarrei laguntzeko bulegoetan, Ingurune Naturala eta Nekazaritza Sustatzeko Saileko Abeltzaintza Zerbitzuaren erregistroetan edo Foru Erakundeko erregistro nagusian.