2021(e)ko abenduaren 17(a) 13:06

Aldundiak Gaztelugatxeko Ermu-Lurgorri bidea ireki eta Pagomakurrera iristeko ibilgailuentzako sarbide nagusia itxiko du

Iraunkortasuna eta Ingurune Naturala Zaintzeko Saila

Gaurtik aurrera, foru-erakundeak obrak egingo ditu Laureta eta Upoko-Makatza arteko bidean, Gorbeiako parke naturalean, joan den asteko euriteen ondorioz gertatutako luizia konpontzeko eta eremua egonkortzeko. Lurgorriko mendi-hegalean egindako azterketa geologikoaren arabera, inguru horretan ez da mugimendu garrantzitsurik egon, eta, beraz, sarbide hori ireki daiteke berriro (azaroaren 26tik itxita zegoen, prebentzio-neurri gisa) .

Pagomakurrerako sarbide nagusiaren irudia

Bizkaiko Foru Aldundiak Gaztelugatxeko Ermu-Lurgorri tartea berriro irekiko du gaur. Tarte hori azaroaren 26tik itxita zegoen, prebentzio-neurri gisa, azken asteetako euriteak direla eta lur-jausirik ez gertatzeko ezarri zen segurtasun-protokoloa betetzeko. Eurite horien ondorioz, joan den abenduaren 10ean luizi bat gertatu zen Laureta eta Upoko-Makatza arteko bidean, Gorbeian, Pagomakurrera sartzeko bide nagusian. Horren ondorioz, ibilgailuentzako pasabidea itxi egin beharko da astelehenetik aurrera eta, gutxienez, abenduaren 23ra arte.

Aldea monitorizatzen duen geologoen taldeak Lurgorriko hegalean egindako azterketa geologikoaren arabera, ez da mugimendu garrantzitsurik egon hegalean; izan ere, azken ekaitzak ez du prezipitazio handirik eragin Gaztelugatxe inguruan, baizik eta pilaketa handiak denboran zehar etengabeko prezipitazioengatik. Ildo horretan, eguneko gehieneko prezipitazioak (24 ordutan) 40 litro baino gutxiagokoak izan dira metro koadroko; hala ere, hamabostaldi batzuetan 190 litro pilatu dira metro koadroko.

Gorbeian izandako lur-jausiari dagokionez, ezponda finkatzeko eta ingurua garbitzeko lanak gaur hasi eta asteburuan egingo dira; makinek lanean jarraituko badute ere, ibilgailuak ibili ahal izango dira. Astelehenetik eta, gutxienez, abenduaren 23ra arte, ibilgailuak ezin izango dira Laureta eta Upoko-Makatza arteko bidetik igaro, egonkortze-lanak ez oztopatzeko. Epe horretan, ibilgailuak Areatzatik iritsi ahal izango dira Pagomakurrera, ohiko bidetik.

Laureta eta Upoko-Makatzaren arteko lanak honako hauek izango dira: ezpondan 46 metroko luzerako iltzadurak jartzea, eremuan dagoen hormigoizko plaka kentzea, luizia gertatu den eremuan harri-lubeta bat sortzea, beheko eremua betetzea eta goiko aldean hormigoizko plaka berri bat jartzea. Lanak egiteko aurrekontua 30.000 euro da.


Argazkiak