2021(e)ko apirilaren 29(a) 11:49

Aldundiak 120 milioi euro inbertitu ditu inbertsio berrietan pandemiaren ondorioz Bizkaia gelditu ez dadin

Ahaldun Nagusiari laguntzeko unitatea

Ahaldun Nagusiak, Unai Rementeriak, iragarri duenez, Bizkaiak bere defizit-ahalmena erabiliko du jarduera eta enplegua sortzen duten inbertsioak egiteko eta eskualdeen eskaerei erantzuteko.

Unai Rementeria eta José María Iruarrizaga

Bizkaiko Ahaldun Nagusiak, Unai Rementeriak, aurreratu duenez, Aldundiak 120 milioi euro osagarri inbertituko ditu Bizkaian, ekitaldi honetarako onartutako aurrekontuetan agertzen ez zirenak. Aurreratu duenaren arabera jarduera, enplegua eta eraldaketa sortzen duten proiektuak dira, eta Aldundiaren defizit-ahalmena erabiliz finantzatuko dira.

Rementeriaren ustez lehentasunezkoa da gaur egungoa bezalako egoeran  inbertsio-ahalmen handiagoa izatea eta, pandemia gorabehera, Bizkaiak martxan jarraitzen duela egiaztatu  du, ildo horretan egiten ari den ahalegin garrantzitsuari esker.

125 milioi euroko pakete honekin finantzatuko diren proiektuen artean daude Sollubeko errepidea hobetzea, Galdakao eta Metroaren arteko lotura, Gertu bulegoak irekitzea, autobus elektrikoak edo hidrogenozkoak erostea eta bide berdeak eta oinezkoentzako bidezidorrak eraikitzeko partida bat.

Inbertsioen zerrenda

  • Aldundiak 35 milioi euro inbertituko ditu Sollubeko errepidean, BI-631, Bermeok Mungiarekin eta Txorierriko korridorearekin duen lotura hobetzeko. Rementeriak azpimarratu duenez, hobekuntza hori egiteak ez du esan nahi Aldundiak Sollubeko tunelei uko egiten dienik.
  • Beste bost milioi euro Mungian, Markinan, Igorren, Bilbon eta Getxon bost Gertu bulego berri irekitzeko erabiliko dira. Gertu eskualdeko bulegoak Aldundiaren arreta integraleko zentroak dira, eta 150 zerbitzu baino gehiago jartzen dituzte herritarren eskura. Gaur egun hiru daude Durangon, Bermeon eta Gernikan, eta laster laugarren bat jarriko da martxan Balmasedan.
  • Aldundiak hamar milioi euro bideratuko ditu udalek edo mankomunitateek kirol-zentroak hobetzeko edo handitzeko obrak egin ditzaten, hau da, zerbitzu horiek ez dituzten udalerri mugakideko edo udalerri mugakideetako pertsonek erabiltzen dituztenean.
  • Hainbat eskualdetatik egindako eskaerari erantzunez, Aldundiaren asmoa da bide berdeetan eta oinezkoentzako bidezidorretan hamabost milioi euro inbertitzea.
  • Lau milioi euro mendiak erosteko eta bertako espezieekin basoberritzeko erabiliko dira.
  • Ahaldun Nagusiak, halaber, aurreratu du Bizkaibuseko ontzidian sartzeko autobus elektrikoak edo hidrogenozkoak erosiko direla.
  • Aldundiak beste 20 milioi euro erreserbatu ditu Galdakao eta Metroaren arteko trenbide-lotura eraikitzeko.
  • Azkenik, 25 milioi euroko pakete bat iragarri du lurralde osoan jarduera ekonomikoa bultzatzeko, ardatzak lehiakortasuna hobetzea eta enplegua sortzea direla.

Argazkiak


Bideoak