2021(e)ko apirilaren 28(a) 10:30

Hiri-hondakinen sorrera %5 murriztu da Bizkaian 2020an

Iraunkortasuna eta Ingurune Naturala Zaintzeko Saila

Iaz 618.609 tona zabor bildu ziren, 2019an baino 29.555 tona gutxiago. Jaitsiera etxeko eta merkataritzako hondakinetan gertatu zen, nahiz eta azken horretan nabarmenagoa izan zen, batez ere aldi baterako itxieragatik eta COVID-19ak sortutako jardueraren murrizketa orokorragatik. Gaikako bilketaren tasa %49,48koa izan zen (2019an baino %0,95 gutxiago). Organikoaren bilketa %2,37raino hazi da berriro, azken urteetako goranzko joera berretsiz, baita ontzi arinena ere.

Hiri-hondakinen sorrera %5 murriztu da Bizkaian iaz; ekitaldi horretan 618.609 tona hondakin bildu ziren guztira, Bizkaiko Foru Aldundiak urtero jasotzen dituen datuen arabera. Kopuru hori 29.555 tona gutxiago da eta, aldi berean, erregistrorik onena izan da 2016tik, urte horretan 605.000 tona bildu baitziren.

Murrizketa etxeko hondakinetan (-%4) eta merkataritzako hondakinetan gertatu da, nahiz eta azken horretan nabarmenagoa izan den (-%6), pandemiaren ondorioz jarduera aldi baterako ixtearen  eta, oro har,  murriztu delako, batez ere Horeca deritzon kanalean (ostalaritza, jatetxeak eta kateringa).

Pandemiak hondakinak sortzen dituzten ohituretan eta jardueretan duen eragina agerian geratzen da etxeko konfinamendua gertatu zen urteko bigarren hiruhilekoari dagozkion datuak aztertzen badira. 2020ko aldi horretan hondakinen sorreraren murrizketa %13koa izan zen, batez ere merkataritzako hondakinen bilketaren beherakadak bultzatuta, sektore horretan jaitsiera %20,26koa izan baitzen.

Hondakinen sorrerak behera egin du, bai gainerako zatikiari dagokionez, bai gaikako bilketari dagokionez. Guztira, lehenengoak 338.705 tona bildu ditu, hau da, iaz baino 8.237 tona gutxiago eta %2ko murrizketa izan du. Horrela frakzio horrek behera egiten jarraitzen du, 2019an ere behera egin ostean 2018ko datuekin alderatuta. Birziklatzeko gaikako bilketak, berriz, 286.546 tona bildu zituen, hau da, %49,48, eta 2019an baino %0,95 gutxiago.

Frakzioka, gaikako bilketaren arloan organikoen bilketak (edukiontzi marroia) gora egin du;  2019ko 12.992 tonatik 2020ko 13.737 tonara igaro da, eta, beraz, %2,37ko tasara iritsi da. Hazkunde horrek azken urteetako joerari jarraitzen dio, bio-hondakin tratatua pixkanaka igotzen joan baita, eta Bizkaiko Foru Aldundiak ezarri zuen eta oraindik ere baduen lehentasunetako bat da. Ildo horretatik, gogorarazi behar da martxoaren 1etik aurrera, landare-jatorriko hondakinez gain, haragi eta arrain hondarrak, gordinak edo kozinatuak, itsaskiak, arrautzak eta horien oskolak, hezurrak eta gazta bota daitezkeela edukiontzi marroira eta, beraz, gaika bildutako hondakin organikoen kopurua berriz ere handituko dela aurreikusten dela.

Ontzi arinen bilketa ere %10,2 hazi da (edukiontzi horia); 21.443 tona bildu dira, eta 19.448 tona 2019an.

Ontzien eta bio-hondakinen bilketaren hazkunde hori ez dator bat paper-kartoiaren eta beiraren bilketak izan duen murrizketarekin, nahiz eta bi horiek bilketa-bolumen handienekoak izaten jarraitzen duten. Beherakada horren arrazoia da merkataritzaren sektoreko bilketan gehien ezarrita dauden frakzioak direlako eta, beraz, pandemiak eragindako jarduera-geldialdiaren ondorioak ere jasan dituztela. Zehatzago esanda, paper-kartoiaren bilketa %12,4 jaitsi da eta 84.054 tona bildu dira; beirarena, berriz, %5,8 murriztu da.


Bideoak


Audioak