2021(e)ko martxoaren 19(a) 10:30

Bizkaiak Zitek enpresa-haztegiak sustatzeko EHU/UPVrekin duen hitzarmena berritu du

Ekonomia Sustatzeko Saila

Ekonomia Sustatzeko Sailak 125.000 euroko dirulaguntza onartu du 2021 honetan, Zitek programaren bidez kultura ekintzailea sustatzen jarraitzeko eta unibertsitateko gazteen artean enpresa berritzaileak sortzeko.

Bizkaiko Foru Aldundiko Ekonomia Sustatzeko Sailak eta Euskal Herriko Unibertsitateak lankidetza estua dute kultura ekintzailea sustatzeko unibertsitateko gazteen artean, negozio-ideiak garatzeko eta enpresa berriak abian jartzeko espazioak eskainiz.

Foru Erakundeak 125.000 euroko dirulaguntza onartu du Zitek, unibertsitateko enpresa-haztegiak, laguntzeko. Ainara Basurkok, Ekonomia Sustatzeko diputatuak, nabarmendu du sailak konpromisoa duela kultura ekintzailea indartzen laguntzen duten jarduera guztiekin, batez ere hezkuntzaren eta prestakuntzaren arloan. Gaurko gazteak biharko ekintzaileak eta liderrak dira. Hezkuntzaren lehen etapetatik ahaleginaren eta berrikuntzaren balioa transmititu behar dugu. Erabaki ausartak hartzeko, desberdin pentsatzeko eta beren buruan sinesteko gauza diren gazteak behar ditugu, baita korrontearen kontra igeri egitera ausartuko direnak ere. Eta balio horiek zerikusi handia dute kultura ekintzailearekin eta enpresa-proiektu bat sortzeko etapekin, azaldu du Basurkok.

Zitek mintegiak unibertsitate-eremuan sortzen diren enpresa-proiektu berrietarako inkubagailuak dira eta EHU/UPVko Bizkaiko campusetan daude, okupazio-maila handiarekin. Enpresa-proiektuei kokapena emateaz gain, mintegietan lan egiten duten enpresa berriei garatzeko eta merkatuan finkatzeko zerbitzuak eskaintzen dizkiete.

Zitek Ekonomia Sustatzeko Sailak Beazen bidez kudeatzen dituen 6 inkubagailuetako bat da. Bi hamarkada daramatza lanean eta 112 enpresa sortzen lagundu du; horietatik 53 oinarri teknologikoko enpresak dira. Gaur egun, mintegi horrek 20 enpresa-proiektu hartzen ditu, eta hiru espaziotan banatzen da Leioako campusa eta Bilboko Ingeniaritza Eskola, Bilboko eta Portugaleteko eraikinetan.