2020(e)ko otsailaren 24(a) 11:00

Hogeita hamar bat profesional bildu ditu Bizkai Talentek Bostongo Be Basque Talent Meeting-ean

Ekonomia Sustatzeko Saila

Bizkaiko Foru Aldundiak bultzatutako elkarteak bidea erakutsi die Euskadin ibilbide profesionalarekin jarraitzeko aukerak aztertzen dituzten profesionalei

Basque Talent Boston 2020

Hogeita hamar bat profesionalek parte hartu dute igande honetan Bizkaia Talentek Bostonen antolatutako Be Basque Talent topaketan. Nazioarteko lan-esperientzia bilatzen duten kualifikazio handiko profesionalei zuzendutako hitzaldiak aukera ematen die parte-hartzaileei lan-merkatuaren munduko joerei buruzko ezagutza zabaltzeko, bai eta euskal erakundeek eta enpresek gero eta gehiago eskatzen dituzten eta eskatuko dituzten beharrak eta gaitasunak ezagutzeko ere.

Bostongo hitzordura kualifikazio handiko 30 profesional hurbildu dira, Massachusetts hiriburuan eta inguruetan lan egiten dutenak, batez ere STEM sektorekoak, eta Graphenea, Biobide, Testualia, Osito & Co, Irisbond eta Alias Robotics bezalako euskal erakundeak. Bertaratutakoek zuzenean ezagutu ahal izan dute euskal lan-merkatuaren egungo egoera, bai eta profesionalen karreran garapen eta konexio elementua den Be Basque Talent Networken parte izateak eskaintzen dituen aukerak eta abantailak ere. Aldi berean Euskal elkarteak profesionalei Euskadira itzultzeko prozesuan laguntzeko dituen tresnen berri ere eman da.

Parte hartu duten erakundeetako batzuk BEAZek Cambridge Innovation Centerren kudeatzen duen Bizkaia International Startup Connection programaren parte dira. Programa horren helburua ekintzaileak eta tokiko startupak Bostongo berrikuntza-ekosistemarekin konektatzea da.

Professional Networking

Kontaktuak erakunde eta enpresentzat aktibo garrantzitsuenetako bat dira. Eta behar bezala kudeatutako eta ustiatutako sare batek abantaila lehiakorra izan dezake eta etekin kalkulaezinak ekar ditzake. Horrela, Bizkaia Talenten iritziz networking profesionalak, mugikortasuna eta talentuaren fluxua sustatzeaz gain, apustu segurua ere badakar Euskadin hazkunde ekonomikoa sortzeko.

Professional Networking zerbitzuaren esparruan, Bizkaia Talentek hainbat jardunaldi tematiko antolatu ditu urtean zehar 2008az geroztik, Be Basque Talent Meetings (BBTM) eta Be Basque Talent Conferences (BBTC), euskal ekonomiarentzat estrategikoak diren sektoreetan lan egiten duten kualifikazio handiko profesionalekin. 2019an Parisko BBTC eta Bostongo BBTM, Gotemburg, Amsterdam, Helsinki, Hannover, Londres eta Dusseldorfeko BBTen ostean, Bizkaia Talent 2020an AEBetako Boston hirian estreinatuko da.

Be Basque Talent Network Euskal Herriarekin lotuta dauden edo egon nahi duten munduko kualifikazio handiko profesionalen sare handiena da. 100 herrialdetan baino gehiagotan eta 430 euskal erakundetan baino gehiagotan banatutako 13.500 profesionalek baino gehiagok osatzen dute. Helburua mundu osoan lan egiten duten profesionalak beste profesional eta enpresa batzuekin harremanetan jartzea da talentuaren mugimendua, kontaktuen sorrera eta merkataritza-harremanak errazteko.


Argazkiak