Mendekotasun-egoera ebaluatzeko jarraibideak

Martxoaren 6an eta, ondoren, 15ean, COVID-19aren pandemia dela-eta alarma sanitarioaren egoera deklaratu ondoren, Bizkaiko Foru Aldundiak neurri murriztaile batzuk hartu zituen mendekotasun-egoeraren ebaluazioei dagokienez, birusaren transmisio komunitarioa saihesteko eta. bereziki, birusa egoitza-zentroetara ez sartzeko. Testuinguru horretan, presazkotzat jotakoetara mugatuta geratu ziren ebaluazioak.

Funtsezkoak diren prestazio eta zerbitzu batzuk eskuratzeko ezinbestekoa da mendekotasun-egoera ebaluatua izatea; beraz, birusaren transmisio komunitarioaren gaur egungo testuingurua kontuan hartuta eta konfinamenduan hilabete baino gehiago igaro ondoren, honen bidez eguneratu nahi ditugu neurri horiek.

Hemendik aurrera, berriro ere ekingo diogu mendekotasun-egoeraren ebaluazioak egiteari, baina baldintza hauetan:

EBALUATZAILEEI DAGOKIENEZ

  • Ebaluatzaileek ez dute aldi batera egingo jarduera profesional hau beste ezein jarduera sanitario eta soziosanitariorekin, baldin eta hori dela-eta kontaktuan egon badaitezke COVID-19a dela-eta positibo diren edo ikerketapean dauden pertsonekin.
  • Arnas aparatuko infekzio akutuaren antzeko koadro klinikoa duen edozein pertsona (sintoma hauetako edozeinen bat-bateko hasiera: eztula, sukarra, arnasa hartzeko zailtasuna), larritasuna edozein dela ere, ez da joango lanera, eta lan-zentroari jakinaraziko dio.

EBALUAZIOAK ZENTROETAN EDO GIZARTE-ERAKUNDEETAN:

  • Bertan behera geratzen dira zentroetan edo gizarte erakundeetan in situ egiten diren ebaluazioak, salbuespenezko kasu arrrazoituetan izan ezik.
  • Teknikoki posible bada, aztertuko da ea beste mekanismorik erabil daitekeen ebaluazioa egiteko.

EBALUAZIOAK ETXEETAN:

  • Bisita egin aurretik, telefonoz konfirmatuko da ebaluazio-eskatzaileak eta zaintzaileak ez dutela arnas aparatuko infekzio akutuaren antzeko sintomarik. Sintomarik izanez gero, ebaluazioa atzeratu egingo da, sintomarik (sukarra edo arnas aparatuko infekzioaren sintomak) izan gabe 15 eguneko epea bete arte. Areago, profesionalak etxera joten direnean gertatzen bada egoera hori, ebaluazio ez da egingo.
  • Beharrezkoa diren babesak jarrita etxera heldu aurretik, eskatuko da ebaluazioa etxeko leku egurastuenean eta handienean egin dadila, segurtasun-tartea gordetzeko. Gela txikia bada, ebaluatzaileak banan-banan sartuko dira, eta ebaluazioa gizarte-ebaluazioarekin eta zerbitzuen eta/edo prestazioen proposamenarekin amaituko da.
  • Ebaluazio-taldeko kideak behar bezala akreditaturik joango dira, eta maskara eta eskularruak eramango dituzte.
  • Bisitan, beharrezkoak diren erreferentzia-pertsonak baino ez dira egongo: oro har, senide bakar bat.

KASU GUZTIETAN HARTU BEHAR DIREN PREBENTZIO-NEURRI OROKORRAK:

  • Garbitu eskuak bisita bakoitzaren aurretik eta ondoren.
  • Eztul edo doministiku egitean, estali ahoa eta sudurra ukondoarekin edo zapi batekin. Bota zapia berehala eta garbitu eskuak alkoholez egindako eskuetako desinfektatzaile batekin edo ur eta xaboiarekin.
  • Gutxienez metro eta erdiko edo bi metroko distantzia mantendu.
  • Ez ukitu begiak, sudurra eta ahoa.