Bizkaian desgaitasunen bat duten pertsonak artatzen dituzten hamalau laguntza-zentrok Gordexolan egindako aldarrikapen-ospakizun batean hartu dute parte; jaiegun horretan, jarduera hauek antolatu dira: haka bat, rugby toucheko erakustaldia eta Bizkaiko Foru Aldundiak urtero antolatutako IX. Paella Lehiaketa.

Foru-zentroetan bizi diren 200 pertsonak baino gehiagok "Dibertsitate funtzionalaren aldeko haka" egin dute; haren bidez, aldarrikatu dute nork bere bizi-proiektu independentea izateko eta hura osoki gozatzeko eskubidea. Horretarako, Getxo Errugbi Inklusiboa talde mistoko zenbait kide izan dituzte lagun, bai eta Getxo Errugbi Taldea talde profesionaleko kide batzuk ere.

Bizkaiko Foru Aldundiaren Gizarte Ekintza Sailak, Isabel Sánchez Robles foru diputatua buru zuela, parte-hartze aktiboa izan du ospakizun horretan; jaiegun ludikoa izan da, eta, horrez gain, aldarrikatu ere egin da. Hauxe adierazi du Sánchez Roblesek: Gaitasun anitzak dituzten pertsona guztiek eskubidea dute beren bizi-proiektu independentea izateko eta hura osoki gozatzeko. Desberdintasunaren, pertsonen autodeterminazioaren eta benetako integrazio normalizatuaren alde egiten dugu.

Jarduera horrekin batera, Bizkaiko Foru Aldundiaren Gizarte Ekintza Sailak urtero antolatutako paella lehiaketa tradizionala egin da -bederatzigarren urtez antolatu da aurten-.

Giro paregabea izan da lehiaketa horretan, eta Gizarte Urgazpenerako Foru Erakundeko eta, horretan, gonbidatutako beste zentro batzuetako zenbait erabiltzailek eta profesionalek hartu dute parte, aktiboki, eta beren sukaldaritza-dohainak agerian utzi dituzte.

Hain zuzen ere, Zubiete, Errekalde, Zumelegi, Lusa, Loiu-Udaloste, Orduña, Bekoetxe, Lurgorri eta Birjinetxe zentroek hartu dute parte. Halaber, harremanetan izan ohi diren beste zentro eta erakunde batzuk ere bertaratu dira, hala nola Apnabi, Gorabide, Lantegi Batuak, Menagarai zentroa eta Uribe-Kosta elkartea (Gaude elkartea).

Denak izan dira irabazle eta denek jaso dute saria; izan ere, lehiaketa erabat integratzailean parte hartu izana saritu da.

Ezgaitasunen bat duten pertsonentzako zentroen foru sarea

Aldundiko Gizarte Urgazpenerako Foru Erakundeak 9 laguntza-zentro publiko kudeatzen ditu osotara: 7 egoitza-zentro (223 plaza) eta 2 eguneko zentro (69 plaza). Horrez gain, Gizarte Ekintza Sailak ehun hitzarmen baino gehiago ditu sinatuta hirugarren sektore sozialeko hainbat erakunderekin, eta horiek egitura ematen diote ezgaitasunen bat duten pertsonentzako zerbitzuetan aurrendari den sareari. Osotara, 1.245 plaza daude egoitza-zentro zein etxebizitzetan, eta 1.326 plaza eguneko zentroetan. Horrez gain, Foru Aldundiaren eskaintza osatze aldera, bada gainerakoak bezain garrantzitsua den beste sare bat, zentro okupazionalena, eta hark 1.410 plaza ditu.