Euskara eta Kultura diputatu andreak, Lorea Bilbaok, eta Aranzadi erakundeko ikerlariak, Iñaki García Uribe jaunak, Bizkaiko Foru Artxibora bertaratu dira, argazki funts garrantzitsua gordailutzera. García Uribek dohaintzan eman ditu askotariko gaiak jorratzen dituzten ia 14.000 negatibo, XX. mendeko 50eko hamarkadatik XXI. mende hasierara artekoak, eta Bizkaiko Foru Artxiboan gordailatu ditu, María Díaz de Haro kaleko 11. zenbakian.

Funts hori Javier García Rodrigok osatu zuen, Iñaki García Uriberen aita zenduak. Javier Goi Nerbioan argazkizale garrantzitsutzat jotzen zuten eta argazkigintza bere beste zaletasunarekin bateratzen zuen: mendizaletasunarekin. Semeak, Iñakik, haren argazkigintzako lan osoa berrantolatu du.

Lorea Bilbaok adierazi du dohaintzan emandako dokumentazioak Bizkaiko funts historiko eta dokumentala aberasten duela.

Funts honek balio historikoa dauka, sakon eta zabal islatzen baititu Bizkaiko eta, bereziki, Goi Nerbioiko eta Arratiako bizimodua, ohiturak, etnografia eta mendizaletasuna, ia 60 urteko epe zabalean (1955etik 2009ra bitartean, gutxi gorabehera).

Dohaintza 13.868 argazki negatibok osatzen dute guztira. Argazki funts honetan jasotzen diren gaiak askotarikoak dira. Hala ere, mendizaletasunaren munduarekin zerikusia duten irudiak gailu arren (kanpatzeak, ibilaldi erregulatuak, mendi mezak … ), bestelako argazkiak ere daude, hala nola ohitura, folklore eta etnografia arloko edukia dutenak, adibidez jaiak, erromeriak edo zezenketak. Gainera, irudietan bidaiak ere protagonista dira eta besteak beste aipatutako epeko paisaiak, gazteluak, ermitak eta zubiak azaltzen dira. Azkenik, familiarteko edukia duten argazkiak agertzen dira.

Negatiborik gehienak Goi Nerbioin eta Arratiako Haranean hartutako argazkienak dira (Orduña, Ugao, Zollo, Gorbeia, Orozko, etab.), baina beste leku askotako irudiak ere daude: El Escorial, Lourdes, Bilbao, Ezkerekotza, Agurain, Gernika, Villanúa, Gordexola, Pico del Fraile, Vitoria-Gasteiz, Lekeitio, etab.

Bizkaiko Foru Artxiboaren helburu nagusia da jakintza sortzeko zentro izatea. Zentzu honetan, funtsen kudeaketa lana bideratzen da ikerlarien eta, oro har, gizarte osoaren zeregina erraztera, horren bidez kolektibo gisa dugun nortasunean sakondu ahal izateko.

Foru Artxiboa 1990ean sortu zen eta Iñaki García Uribe jaunak egindako dohaintza gehitu behar zaie gaur egun Bizkaiko Foru Artxiboan gordetzen eta kudeatzen diren milioi eta erditik gorako agiriei.

Javier García Rodrigo

Arrigorriagako Padura Mendi Klubeko zuzendaritza kide eta burua izan zen zenbait alditan. Horren ondoren, Ugaon bizi izan zen; bertan Ugao Mendi Taldearen fundatzaileetariko bat izan zen eta lehenengo presidentea. Hamaika proiektu ilusionagarritan parte hartu zuen, esaterako Nerbioi-Ibaizabaleko Taldean; elkarte horrek mendi ibilaldiak, mendi txapelketak, hitzaldiak, argazki erakusketak... antolatzen zituen. Umeentzako udalekuetan zineaz arduratzen zen eta haren argazki artxiboa eta super 8koa (zoritxarrez 1983ko uholdeetan galdu zena) toki askotatik zabaldu da, argazkien kopiak ehunka mendizalerentzako opari bihurtu baitziren. Euskal Herriko Mendi Federazioko prentsa ordezkari gisa, Gaceta del Norten informatzen zuen, bai eta Bilboko Herri Irratian ere.