2016ko abenduaren 31n Foru Ogasunari milioi bat euro baino gehiago zor zizkioten zordunen zerrenda argitaratu du Bizkaiko Foru Aldundiak. Zerrenda horretan 155 zergadun agertzen dira, eta guztien artean 442.086.834,40 euroko zorra dute. Zerrenda horretatik sei bakarrik dira pertsona fisikoak, eta gainerakoak pertsona juridikoak dira, zeintzuen zor edo zerga-zehapenak borondatezko epea igaro ondoren ordaindu gabe zeuden. Bigarren aldia da Bizkaiko Foru Ogasunak zordun handien zerrenda argitaratzen duena, eta aurreko irailaren 30ean jakinarazi zen zerrendarekin alderatuta, oraingoan sei zergadun gehiago agertzen dira eta metatutako zorra 6.434.251,61 eurokoa da.

Zerrenda hau argitaratzea Iruzur Fiskalaren Aurka Borrokatzeko Planaren barne dago, iruzur fiskala saihestera bideratuta dago eta herritarren kontzientzia fiskal kolektiboa sendotzea bilatzen du iruzurrari jarraitzeko eta zigortzeko ekintzak osatzeko. Neurri hori Batzar Orokorretan onartutako Foru Arauak arautzen du eta zerga sistemaren eraginkortasuna sustatzeko beharraren eta intimitatea izateko eskubidea babestearen arteko oreka zaintzen du. Beraz, zerrenda hau baliabide elektronikoen bitartez argitaratu da eta bere edukia Interneteko bilaketa motorren bidez ezin indexatu ahal izatea bermatuta dago. Era berean, zerrenda hori bakarrik hiru hilabeteetan zehar egongo da eskuragarri. Horrez gain, nabarmendu behar da zerrenda argitaratu aurretik zordunei zerrendan zeudela jakinarazi zitzaiela, eta alegazioak aurkezteko epea izan zutela.

Foru Ogasunak urte bakoitzeko lehenengo seihilekoan argitaratuko du aurreko urteko abenduaren 31n milioi bat euro baino gehiagoko zorra zuten pertsonen zerrenda.