Bizkaiko Foru Aldundiak foru dekretu arauemaile bat  onartu du, Hiri-Lurren Balioaren Gehikuntzaren gaineko Zergari buruzko 8/1989 Foru Araua aldatzen duena. Dekretu hori dela eta, Bizkaiko udalek lursailen eskualdaketaren ondorioz irabaziak daudenean soilik egin ahal izango dute zerga horren likidazioa.  Lurren gainbalioa dagoela zehazteko bi balio hauek alderatuko dira: batetik, lurraren eskurapen-balioa, eta, bestetik, lurraren eskualdaketa-balioa, edo, dagokion kasuan, jabaria mugatzen duen gozamen-eskubide errealaren (adibidez, gozamen-eskubideak nahiz erabili eta biztantzeko eskubideak) eraketa edo eskualdaketari dagokiona.

Foru dekretu arauemaile bidez onartutako aldaketa hori argitaratu eta biharamunean jarriko da indarrean; dena den, nabarmendu behar da aldaketa aplikatu ahal izango dela oraindik irmoak ez diren zergaren likidazioetan. Horrela, zergadunek zerga itzultzeko eskatu ahal izango dute, higiezinaren eskualdaketaren ondorioz edo eskubideen eraketa edo eskualdaketaren ondorioz irabazirik egon ez den kasuetan.

Bizkaiko Foru Aldundiak, Eudelekin adostuta, erabaki du aldaketa hori egitea, Bizkaiko udalek zergaren aplikazioari buruzko zalantzak izan dituztelako. Horrekin lotuta, kontuan hartu behar da Konstituzio Auzitegiaren epaiek gainbalioaren gaineko zergari buruzko Arabako eta Gipuzkoako foru arauak eta Estatuko araudia deuseztatu dituztela. Bizkaiko foru arauak indarrean jarraitzen du; hala ere, konstituzioaren aurkakotzat jo diren manu berdinak jasotzen dituenez, Bizkaiko Foru Aldundiak beste foru arau bat egiteko prozedurari ekin zion orain dela aste batzuk, eta, horretarako, herritarren ekarpenak jasotzeko prozesua ireki du bere atariaren bidez. Horrela, araua berrikusteko prozesua aurrera joango da, beste lurralde historikoekin koordinatuta.