Unai Rementeria Bizkaiko Ahaldun Nagusiak gaur goizean bisitatu du herritarrei arreta integrala emateko lehenengo bulegoa. 150 izapidetik gora eskaintzen ditu eta Durangaldean bizi diren 75.000 pertsonei emango die zerbitzua, Aldundiarekin egin beharreko izapideak eskualdean bertan egin ditzaten, Bilbora joan beharrik gabe.

Rementeriarekin batera, bisita honetan, Ibone Bengoetxea Herri Administraziorako eta Erakunde Harremanetarako diputatua eta Aitziber Irigoras Durangoko alkatea egon dira. Herritarrei arreta emateko eredu honek aldaketa handia dakarrela azpimarratu du. "Bizkaiko Foru Aldundia herritarrengana hurbildu nahi dugu. Horregatik, legegintzaldi honetan hartu ditugun konpromisoetako bat eskualdeetan arreta integrala emateko bulegoak sortzea zen, hurbiltasuna bermatzeko, lurralde osoan garapen orekatua bultzatzeko, eta sail estankoen eredua gainditzeko. Eskualde-bulegoek arreta, informazio eta izapidetze zerbitzu integrala eskaintzea gura dugu".

Ahaldun nagusiak, bestalde, azpimarratu du helburua dela "herritarrek ez dezatela Bilbora joan behar izan izapide bat egiteko, ezta leihatilaz leihatila ibili behar izan ere". Horrez gain, herritarren arretarako eskualde-bulegoen bidez, dagokien eskualdeko bizilagunek ez ezik, edozein pertsonak egin ahalko ditu izapideak, bizilekua non daukan gorabehera. "Izan ere, Bizkaiko Foru Aldundiak eskualdeetan dauzkan bulegoak dira", azpimarratu du Rementeriak.

Herritarrei arreta integrala emateko eskualdeko bulegoak funtsezko pieza bat dira Bizkaiko Foru Aldundiak bizkaitarrei eskaini gura dien arreta-ereduan. Eredu honen ezaugarria da sarrera bakarreko eredua dela, foru erakundearekin edozein pertsonak izapidetu behar dituen kudeaketa guztiak egiteko balio duena. Orain arteko eskema, beraz, zerbitzuak sailaren edo zerbitzuaren arabera sailkatzen dituena, bertan behera utziko da.

Hain zuzen ere, gaur arte udalerri honetako Aldundiaren Ogasunaren bulegoa izan den lekuan dago bulego berria (Askatasun etorbidea 12), eta eredu berri honen arabera funtzionatzen ari da azaroaren erdialdetik aurrera. Bertan 15 lagun ari dira lanean. 6 agente integralek arreta orokorra ematen dute izapide erraz eta masiboetarako, eta 9 agente espezializatuk eragiketa konplexuak egiten dituzte.

Izapide eta zerbitzu berriak

Lehen Eskualdeko Nekazaritza Bulegoan egiten ziren zerga-kudeaketak eta nekazaritzako izapideak egiteaz gain, Durangoko bulegoak 150 baino zerbitzu gehiago eskaintzen dizkie herritarrei. Haietako batzuk lehen aldiz ematen dira instalazio hauetan, esate baterako:  Bizkaiko Foru Aldundiaren zerbitzuei buruzko informazio orokorra, erakunde honi eta beste administrazio publiko batzuei zuzentzen zaizkien idazkien erregistroa, jakinarazpenak ematea, Aldundiaren hautaketa prozesuetan izena ematea, Aldundiak kudeatzen dituen gizarte prestazioak kobratzeari edo ez kobratzeari buruzko ziurtagiriak ematea, familia ugariaren titulua, sinadura elektroniko aurreratuko ziurtagiriak, eta garraiolarien takografo digitaleko txartelak. Gainera, kexak eta iradokizunak aurkeztu ahal dira.

Pilotajea probatu ahala areagotuko dira zerbitzuak. Hain zuzen ere, bulegoa funtzionatzen jarri zenetik hartu diren kontsulten kopururik handiena, % 21 zehazki, orain arte Durangon eskaintzen ez ziren zerbitzuei buruzkoa izan da, gero Errentaren gaineko Zergari buruzko kontsultak (% 18), Katastroari buruzkoak (%  16), nekazaritzako izapideak (% 15) eta zergei buruzko beste izapide batzuk (% 15). Funtzionatzen hasi zenetik, Durangoko bulegoak 4.500 pertsona baino gehiago hartu ditu. Abenduan soilik 2.607 izan dira.

Itxaronaldiak ekiditeko, aurretiaz hitzordua hartzeko sistema bat martxan jarri da, gaurtik aurrera telefonoz edo Internetez eska daitekeena: 94 406 80 00 edo www.bizkaia.eus/citaprevia.

Durangokoa da martxan jarri den lehenengo eskualde-bulegoa, baina Bizkaiko Foru Aldundiak beste bulego pilotu bat irekitzeko asmoa dauka, Busturialdean, 2017. urtean zehar.