Itsasmuseum Bilbao. J. S. Elkanoren. Aztarnaren bila

  • Noiz

    2019/06/26(e)tik 2020/06/26(e)ra

  • Web

    Bisitatu

Bilbao

J. S. Elkanoren aztarnaren bila erakusketak Juan Sebastian Elkanoren bizitzan sakondu nahi du (1487/88-1526): bisitariek aukera izango dute Elkanoren bizitzaren aztarnari segitzeko, eta jakiteko nolakoa zen Elkanoren bizitza zirkumnabigazioaren aurretik, bitartean eta ostean. Zirkumnabigazioa orain dela 500 urte abiatu zen, espezia-irletara joateko bide berri bat topatu nahian.

Erakusketa hau anbizio handiko proiektua da: Bizkaiko Foru Aldundiaren Kultura Sailak eta Seguros Bilbao enpresak babestu dute, eta beste hainbat kolaboratzaile izan dituzte, hala nola IKEA Barakaldo, Baskegur, Siloe, Antiquus, Horizonte Elkano eta Taberna Libraría. Gainera, bisitariak eskura izango ditu bai infografia interesgarri askoak –El Correo egunkariko infografistek egin dituzte, Gonzalo de las Heras buru dutela– bai audio gidak, bisitan barrena gidatzeko –lau hizkuntzatan daude: euskaraz, gaztelaniaz, ingelesez eta frantsesez–.

Zer ote dakigu Juan Sebastian Elkanori buruz?

Erakusketa honetan, zeina Julián Díazek komisariatu baitu, bisitariak eskura izango ditu Elkanoren bizitzari buruzko informazioa gordetzen duten iturri originalak, eta, hala, bisitariak berak aterako ditu bere ondorioak. Gainera, erakusketa honetan bildu diren erakusketa-gailuen bitartez, galdera honi erantzun nahi zaio: zer ote dakigu Juan Sebastian Elkanori buruz?

Erakusketa honetan, Elkanoren bidea ezagutuko dugu: hastapenetan, maisu moduan aritu zen; ondoren, Fernando de Magallanesek zuzenduriko espedizioan parte hartu zuen, eta, zirkumnabigazioaren ostean, Extremadura eta Portugal aldean ibili zen, Karlos V.a enperadorearen agindutara; azkenik, beste bidaia bat egin zuen iltzearen uharteetara. Bidaia hori Bermeotik abiatu zen, eta Ozeano Barean barrena zebiltzala, Elkano hil egin zen. Andrés Urdaneta gazteak hartu zuen nabigatzaile ospetsuaren lekukoa, lehenago haren agindutara aritua baitzen.

Erakusketa honetan dokumentazio ugari eta osoa erakusten da: besteak beste, badira hainbat hizkuntzatan idatziriko agiriak –gaztelaniaz, portugesez, italieraz, latinez eta malaysieraz–, eta horietako asko ez dira inoiz erakutsi jendaurrean. Agiri horiek transkribatu eta itzuli egin dira gaztelaniara, euskarara eta ingelesera; hala, bisitariak aukera ezin hobea dauka historiari begiratzeko.

Hautaturiko irudi eta objektuei esker, jauzi bat egin eta duela bost mendetako girora bidaiatu dezakegu: munduan barrena zebiltzala nabigatzaileek ezagutu zuten jendea ikusiko dugu, hala nola Brasilgo indigenak eta Patagoniako erraldoiak. Era berean, nabigatzaileen eguneroko bizitzari buruzko pintzeladak ere eskaintzen dira erakusketa honetan: besteak beste, elikadura, nabigatzeko tresnak, sexualitateari eta euskararen erabilerari buruzko arauak ezagutuko ditugu. Horri guztiari esker, iraganaren eta gaur egungo bizitzaren artean loturak ezartzeko aukera izango dugu.

Erakusketa hau antolatzeko, funtsezkoa izan da hainbat artxibategi, instituzio eta museoren laguntza. Besteak beste, erakunde hauek lagundu dute erakusketa: Archivo General de Indias (Sevilla), Euskadiko Artxibo Historikoa –Laurgainen deskubrituriko agiri garrantzitsuen erreprodukzioak eman ditu erakunde horrek–, Arquivo Nacional da Torre do Tombo (Lisboa), Bibliothèque Nationale de France, Biblioteca Nacional de España, Euskal Museoa, Museo Nazionale della Montagna de Torino eta Arabako Armagintza Museoa.

Euskadi eta Bizkaia

Euskadik eta, bereziki, Bizkaiak ekarpen handia egin zioten Elkanoren bidaiei. Adibidez, Bizkaikoak ziren espezia-uharteetara egindako bi espedizioetako 12 itsasontzietatik 7, eta, era berean, Bizkaiak hainbat lanabes eman zituen, batez ere burdinazko tresnak.

Victoria itsasontzian Sanlucarrera iritsi ziren 18 marinelen artean, 4 ziren euskaldunak: Juan Sebastian Elkano bera –Getarian jaioa–, eta Bizkaiko beste hiru gizon: Juan Arratia –Bilbokoa–, Juan Zubileta –Barakaldokoa– eta Juan Akurio –Bermeokoa–.

Balioak

Proiektu honek agerian uzten du gaur egungo gizartearen eta orain dela 5 mende bizi ziren pertsonen artean badirela balio komun edo unibertsal batzuk, hala nola ausardia, eskuzabaltasuna, lankidetza eta adimena.

Komisarioa

Julián Díaz Alonso arduratu da erakusketaren gidoia osatzeaz eta komisario-lanak egiteaz. Díaz Alonsok eskarmentu handia du alor honetan, hainbat erakusketa ekoitzi eta muntatu ditu hainbat museo eta interpretazio-zentrorentzat, eta, azkenaldian, espezia-irletara egindako nabigazioei buruzko dokumentazioa aztertzen ibili da. Halakoak zabaltzeko asmoz, saga bat sortu du, “Sangre y especias”, eta, oraingoz, bi eleberri argiratu ditu horren barruan. Azkenik, Elkano Fundazioak hala eskatuta, Juan Sebastian Elkanori buruzko audio-liburu biografiko bat amaitzen ari da.

Ordutegia

  • Neguko ordutegia (Urriaren 27tik martxoaren 31ra)
    • Asteartetik ostiralera: 10:00etatik 18:00etara.
    • Larunbatetan, igandeetan eta jai egunetan: 10:00etatik 20:00etara.
    • Astelehenetan: itxita
    • Astearteetan: sarrera dohainik (Ikasturtean zehar, irailetik ekainera bitartean.)
  • Udako ordutegia (Martxoaren 3tik urriaren 27ra)
    • Asteartetik igandera: 10:00etatik 20:00etara.
    • Astelehenetan: itxita.
    • Astearteetan: sarrera dohainik (Ikasturtean zehar, irailetik ekainera bitartean.)

Argibide gehiago

Tarifak

  • Familiak
    • Pertsonako 3 €
      * Gutxienez 2 pertsona nagusi eta 6 urte baino gehiagoko adingabeko 1.
    • Familia ugarien kide bakoitzeko 2 €
      * Tarifa honetara heltzeko, familiako kide guztiak etorri beharko dira eta Familia Ugarien agiria erakutsi.
  • Banakakoa
    Orokorra 6 €
  • Murriztua *
    • Erretiratuak eta 65 urtetik gorako pertsonak, ikasleak (26 urte gehienez),
      langabeak eta desgaitasuna duten pertsonak. 3,5
      * Kasuan kasuko dokumentazioa eskatuko da sarrerarekin batera
    • Adingabeak
      6 urte Doan
  • Audiogida 2 €
  • Taldeak (15 pertsona gutxienez)
    • Ikastetxeak 2 €
    • Hezkuntza-tailerrak 3,5 €
    • Elkarteak eta bestelako kolektiboak 3 €
  • Erreserbarik gabe
    Talde-sarrera 3,5 €

Itsasmuseum Bilbao. Ramón de la Sota kaia, 1. 48013 Bilbo (Bizkaia)

Eta gainera